CONTACTO
  • Carpichos espidos
    •
  • os nosos fondos
    •
  • Audi
    •

    Volver

    Ourense, 10 de xaneiro de 2018.

    O Proxecto Youtubeir@s, no que participa o Servizos de Normalización Lingüística do Concello de Ourense, lanza a segunda edición dos seus premios coa vontade de promover e de lle dar visibilidade ao uso do galego a través da rede social de vídeos máis grande do mercado global: Youtube. O prazo permanecerá aberto até o vindeiro 15 de marzo para as tres categorías (vídeo-facermos, vídeo-opinarmos e canle), e até o 20 de febreiro para a #propostayoutubeira, a novidade desta edición, e na que se poderán propoñer os mellores vídeos doutras persoas.

    Nesta segunda edición dos Premios Youtubeir@s repartiranse tres premios de 1.000 euros e cinco de 500 euros para os vídeos gañadores, e o xurado valorará tanto o enxeño e a creatividade, coma a calidade técnica, a eficiencia comunicativa ou a calidade lingüística.

    Vídeo-Facermos. Esta categoría é para os vídeos nos que se amosen os saberes e procesos de elaboración a través de titoriais para que outra xente poida aprender. Así, entrarían nesta categoría receitas de cociña, trucos de maxia, habilidades especiais, etc.

    Vídeo-opinarmos. Trátase de expor unha opinión ou valoración arredor dun tema de interese e dun xeito argumentado. A temática é libre.

    Canle. Pódese presentar ao certame unha propia canle de vídeos, sempre que sexan de produción propia. Valorarase a calidade na creación de contidos, a traxectoria, a constancia e a capacidade de repercusión (número de visualizacións, comentarios, interaccións...)

    Na primeira edición dos Premios, Ourense tivo un protagonismo moi activo con dez participantes. Unha das propostas participantes -a de Eira Losada- chegou até a final do concurso. Para esta segunda edición, o propio alcalde, Jesús Vázquez, anima á participación con este vídeo.

    Toda a información e bases completas, en www.youtubeiras.gal

     
    Ourense, decembro de 2017
     
    O programa Apego para a dinamización sociolingüística, do que o Concello de Ourense forma parte -xunto con outros 30 concellos de Galicia-, vén de ser recoñecido pola Consellería de Cultura, Educación e Ordenación Universitaria como Premio da Cultura Galega na categoría de Lingua. Apego procura incentivar, favorecer e colaborar na socialización en galego da infancia facilitándolles ás familias materiais físicos e espazos de socialización en galego, caso das representacións para bebés no Auditorio Municipal. 
     
    Os Premios da Cultura Galega para o ano 2017 distinguiron tamén a Oliver Laxe, premio Cidade de Ourense, na categoría de Audiovisual, e á música ourensá Cristina Pato, na categoría de Proxección Exterior, entre outros. O xurado, presidido polo conselleiro Román Rodríguez, estivo formado por profesionais de prestixio como Chelo Matesanz, Xosé Manuel Budiño, Dolores Ben ou Belén Pichel.
     
    Santiago, novembro de 2017.-

    O Proxecto Youtubeir@s, organizado polos servizos de normalización lingüística de nove concellos, polas tres universidades e pola Deputación da Coruña, lanza a súa segunda edición coa vontade de promover e de lle dar visibilidade ao uso do galego a través da rede social de vídeos máis grande do mercado global: Youtube . A iniciativa pretende fomentar así a creatividade con temas propios e xerar referentes en galego dun novo axente con gran repercusión social dende o mundo dixital como son os/as youtubeiros/as. 
     
    Así o adiantou hoxe en rolda de prensa, celebrada na Facultade de Ciencias da Comunicación da Universidade de Santiago, a coordinadora de Youtubeir@s, Mónica Fernández Valencia, quen xunto a Martiño Noriega, alcalde de Santiago de Compostela; Goretti Sanmartín, vicepresidenta da Deputación da Coruña; e a vicerreitora de Servizos Universitarios da Universidade de Santiago de Compostela, María do Carme Silva Domínguez, detallou as liñas mestras do proxecto. Ademais, o acto contou coa presenza de José Antonio Cacabelos Rico, alcalde do Grove; José Andrés García Cardeso, alcalde da Baña; Pilar Pérez Faxil, concelleira de Cultura e Educación de Teo; Xosé Regueira, concelleiro de Normalización Lingüística de Carballo, e Belén Iglesias Cortés, concelleira de Cultura e Educación de Ourense. 
     
    Na presentación destacouse a colaboración das diferentes administracións para lanzar a segunda edición de Youtubeir@s, un amplo proxecto que compila diversas accións que buscan un claro obxectivo: incrementar a presenza do galego nos vídeos de Youtube. Dentro desta iniciativa, recóllense varias liñas de acción que van dende campañas de incentivación do uso do galego a través da citada plataforma até a formación de youtubeiros e youtubeiras, pasando por actividades para outorgarlle visibilidade ao proxecto, pola dinamización nas redes sociais co obxectivo de xerar comunidade ou pola convocatoria dos Premios Youtubeir@s.
     
    Premios Youtubeir@s
    Nos Premios Youtubeir@s poderán participar todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle. Todas as pezas participantes teñen que estar publicadas con data posterior ao 2 8 de abril de 2017 sen restricións de privacidade e cos cancelos #youtubeiras #youtubeiros na descrición. En total, o certame entregará 5.500 euros en premios, repartidos nun conxunto de categorías que incrementan o seu número con respecto ao ano pasado. Así, o certame dividirase nos seguintes apartados: vídeo-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. 
     
    Precisamente, este último galardón do público, chamado #propostayoutubeira, é unha das grandes novidades deste ano, xa que as persoas usuarias da rede social Facebook poderán propoñer a través dun simple comentario no perfil de Youtubeir@s un vídeo do que sexan seareiros/as incluíndo o cancelo #propostayotubeira. Os vídeos propostos han de axeitarse ás categorías de vídeo-facermos e vídeo-opinarmos. As bases ao completo pódense consultar no web www.youtubeiras.gal e os premios entregaranse o vindeiro 20 de abril de 2018 nun acto público na Coruña no cal o xurado dará a coñecer os vídeos gañadores.
     
    Formación e festivais
    Por outra banda, o proxecto Youtubeir@s incluíra diferentes programas formativos que se desenvolverán nos concellos e nas universidades organizadoras. Os obradoiros serán impartidos pola produtora Illa Bufarda e farán fincapé nesta nova edición nas persoas maiores de 50 anos non familiarizadas coas novas tecnoloxías Ademais, Youtubeir@s estará presente en eventos culturais galegos como son o Culturgal (no que se realizará unha presentación pública cunha conversa con youtubeiros/as este sábado ás 13.00 horas no Espazo Foro) e festivais relacionados coa creación audiovisual e dixital, co obxectivo de crear sinerxias con festivais para a programación de contidos youtubeiros en galego.
     
    Organización
    Youtubeir@s é unha iniciativa organizada polos Servizos de Normalización Lingüística dos concellos da Baña, Ames, Carballo, Ourense, Pontevedra, Ribadeo, Santiago de Compostela, Teo e O Grove, das universidades da Coruña, Santiago de Compostela e Vigo e da Deputación da Coruña.
     
    Ourense, 28 de novembro de 2017.
    Toponimízate. Falámosche dos nomes da túa terra. Organizada en colaboración coa Secretaría Xeral de Política Lingüística, o filólogo Vicente Feijoo, especialista en toponimia e membro do Seminario de Onomástica da Real Academia Galega, falará dun xeito moi próximo e ameno de toponimia galega: os motivos da abundancia de nomes de lugar no país, a toponimia galega como patrimonio inmaterial... pero tamén da propia de cada concello.
    Así, saberemos o significado dos nomes das parroquias e das aldeas; como consultar a toponimia xeorreferenciada de cada municipio no Buscador de topónimos; ou as utilidades desta ferramenta... Ademais, Feijóo mostrará unha aplicación que lle permitirá á veciñanza colaborar para rexistrar e subir á rede tanto os microtopónimos (nomes de leiras, camiños, fontes, penedos...) como as lendas a eles asociadas, de xeito que todos e todas poidan colaborar na salvagarda deste patrimonio inmaterial.
     
    Ourense, novembro 2017. 
     
    O Concello de Ourense e a Fundación Vicente Risco veñen de outorgar, o pasado venres, o Premio 'Risco' de Creación Literaria a Alberto Ramos, pola súa obra 'A simetría das bestas'. O premio para a obra gañadora é de 6.000 euros en metálico ademais da publicación de 150 exemplares. 
     
    O xurado, reunido no Liceo desde as 18:00 horas, deliberou entre as 16 obras presentadas, estivo composto por: Belén Iglesias Cortés, concelleira de Cultura, exercendo como presidenta; David González Domínguez, vogal (representando á editorial Urco); Benigno Yáñez Pérez, vogal (gañador da edición anterior); Constantino Pazos Sobrino, vogal (profesor de Ensino Secundario); Antonio González Blanco, vogal (profesor de Ensino Secundario); Ánxela Gracián ,vogal (escritora e crítica literaria); e Mónica Fernández Valencia, técnica do Servizo de Normalización Lingüística, actuando como secretaria.
     
    Alberto Ramos, xornalista compostelán, xa gañara o Premio Risco en 2012 coa súa obra “Todos os días”. Na edición deste ano, gañou por maioría cunha obra de corte filosófico, onde concede un espazo de dignidade aos outros, aos diferentes, aos marxinados. O xurado destaca o seu simbolismo e moi bo manexo dos recursos narrativos, así como personaxes moi ben construídas dadas esas discusións filosóficas.
     
    O concurso, que cumpre a súa décimo sétima edición, homenaxea un dos referentes da Xeración Nós, don Vicente Martínez-Risco,e tamén o seu fillo, Antón Martínez-Risco Fernández, ambos veciños de Ourense, e ten no seu palmarés nomes coma os de Xosé Carlos Caneiro, Xosé Luís Martínez Pereiro, Hixinio Puentes ou Xosé Vázquez Pintor.
     
     
    Un videotitorial de como facer un guiso Anti-San Valentín e un vídeo sobre o conflito da praga da
    couza guatemalteca fanse cos premios desta primeira edición de Youtubeir@s - Concurso de
    vídeos na Rede.
     
    Este venres no Teatro Principal de Ourense tivo lugar a entrega de premios do Concurso de
    vídeos na Rede, Youtubeir@s. No transcurso da noite entregáronse os dous premios principais
    valorados cun trofeo e 1.000€. Tamén se anunciaron as catro mencións honoríficas cun premio de
    500€ cada unha.
     
    No acto, presentado pola actriz Iria Pinheiro, fixéronse innúmeras referencias ao mundo
    youtubeiro e aos seus códigos e predominou a ironía e o humor. Iñaki Quenerapú fixo un
    monólogo sobre a importancia de elixir ben a miniatura estática nos vídeos de YouTube e a Vj
    Marta Verde realizou un espectáculo de mistura cos vídeos participantes en directo. O acto contou
    con máis de 200 persoas entre concursantes e representacións institucionais dos concellos e das
    Universidades promotoras do Concurso.
     
    A deliberación do xurado, entre máis de 200 vídeos presentados, resultou complicada.
    Finalmente, as pezas gañadoras foron, na categoría vídeo-facermos, para “Guiso especial
    Anti-San Valentín” realizado polas youtubeiras de Corasón de Churrasco, e na categoría
    vídeo-opinarmos, o premio foi para “Prohibido plantar patacas: a praga da couza guatemalteca”
    presentado polas youtubeiras de Teño unha horta en San Sadurniño. Estes dous premios foron
    entregados por dous membros do xurado, María Yáñez e Manuel Núñez Singala.
     
    As mencións honoríficas foron entregadas pola Concelleira de Cultura e Normalización Lingüística
    de Ourense, María Belén Iglesias e o Concelleiro de Normalización de Pontevedra, Alberto
    Oubiña. A mención especial polo enxeño e creatividade foi para David Otero Fumega co seu vídeo
    “SmartFol G6! Unha Review moi especial” e o premio que destaca a eficiencia comunicativa foi
    asignado ao videotitorial “Tortilla de Pascua” da youtubeira Isabel Villanueva. A mención de honra
    á calidade técnica recibiuna Miguel Rodríguez González pola súa vídeo-opinión “1000 rpm - A
    noite” e o recoñecemento á calidade lingüística foi para o IES Urbano Lugrís de Malpica pola peza
    colectiva “Seis pasos para falar malpicán”.
     
    Youtubeir@s - Concurso de vídeos na Rede remata a súa primeira edición cunha ampla e variada
    participación. Este concurso é unha iniciativa dos Servizos de Normalización Lingüística dos
    concellos da Baña, A Coruña, Ames, Carballo, Mazaricos, Ourense, Pontevedra, Ribadeo,
    Santiago de Compostela, Teo e O Grove; e tamén das Universidades da Coruña, Santiago de
    Compostela e Vigo. 
     

    PREMIOS YOUTUBEIR@S 2017
     
    CATEGORÍA VÍDEO-FACERMOS
    Guiso especial Anti-San Valentín (abstéñanse delicad@s)
    Laura Pego Crugeiras (Corasón de Churrasco)
    https://www.youtube.com/watch?v=1q92_aKw0Dk
     
    CATEGORÍA VÍDEO-OPINARMOS
     
    Prohibido plantar patacas: a praga da couza guatemalteca
    Carmen Suárez Nieto (Teño unha horta en San Sadurniño)
    https://youtu.be/su9ywxJAcDs
     
    MENCIÓNS DE HONRA YOUTUBEIR@S 2017
     
    Mención honorífica ao enxeño e creatividade

    SmartFol G6! Unha REVIEW moi especial...
    David Otero Fumega
    https://www.youtube.com/watch?v=oHdWcGWLngI
    Mención honorífica á eficiencia comunicativa
    Tortilla de Pascua #ogalegomola
    Isabel Villanueva
    https://www.youtube.com/watch?v=CVOamAIc-kg&ab_channel=OGalegoMola

    Mención honorífica á calidade técnica
     
    1000rpm - Video-Opinarmos - A noite
    Miguel Rodríguez González
    https://youtu.be/2B-c2SfeWQU
     
    Mención honorífica á calidade lingüística
     
    Seis pasos para falar malpicán
    IES Urbano Lugrís de Malpica
    https://youtu.be/0EPwpwGs4z0

    Para ampliar información >
     
    Mónica Fernández Valencia, coordinadora de Youtubeir@s
    normalizacionlinguistica@ourense.es
    Teléfonos:686150696

    www.youtubeiras.gal
    concurso@youtubeiras.gal
    https://www.facebook.com/youtubeiras/
    https://www.youtube.com/youtubeiraseyoutubeiros
     

    Ourense, 25 de maio de 2017.

    Este venres 26 de maio ás 20.00h terá lugar no Teatro Principal de Ourense a Entrega de Premios de Youtubeir@s - Concurso de vídeos na Rede. O acto será presentado pola actriz e cómica Iria Pinheiro, contará co monólogo “E non te esquezas da miniatura!” a cargo de Iñaki Quenerapú e coa mestura en directo de tódolos vídeos participantes nesta edición da man da vídeo-DJ Marta Verde.

     

    Neste momento xa se poden ver na canle de Youtube de Youtubeir@s os vídeos finalistas das dúas categorías: vídeo-facermos e vídeo-opinarmos. No acto coñeceranse os nomes das persoas gañadoras que recibirán un trofeo e un premio de 1.000€. Entre os vídeos que optan a este galardón unhas mulleres de San Sadurniño explican como plantar cacahuetes e opinan sobre a praga que está afectando ás patacas, unha moza de Ribeira explica como facer un guiso Anti-San Valentín, un rapaz de Santiago de Compostela mostra como facer un vídeo e unha rapaza de Ourense reflexiona sobre o galego mentres que dende Vimianzo, outra youtubeira debate sobre o seu corpo. Entre os máis de 200 vídeos participantes premiaranse os que destaquen polo seu enxeño e creatividade, pola súa eficiencia comunicativa, pola súa calidade técnica e a súa calidade lingüística. Coñeceranse ás persoas gañadoras con 500€ destas catro mencións honoríficas na Entrega de Premios.

     

    A asistencia é aberta e de balde. Pódense recoller as entradas a partir das 18.00h deste venres na billeteira do Teatro Principal. Youtubeir@s é unha iniciativa dos Servizos de Normalización Lingüística dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove; e tamén das Universidades da Coruña, Santiago de Compostela e Vigo.

     

    Toda a información sobre o Concurso en www.youtubeiras.gal

     

    Ourense, 27 de abril de 2017.

    Este venres 28 de abril é o último día para participar na primeira edición de Youtubeir@s -Concurso de vídeos na Rede. Esta iniciativa pretende fomentar a videocreación en galego na segunda rede social máis empregada do mundo, Youtube, a través de dúas categorías, vídeo-opinarmos e vídeo-facermos. Poden participar tódalas persoas maiores de 14 anos con vídeos de ata cinco minutos de duración. Hai 4.000€ en premios que se repartirán entre as persoas gañadoras nun acto de celebración o venres 26 de maio ás 20.00h no Teatro Principal de Ourense.

     

    Neste momento xa se poden ver na canle de Youtube de Youtubeir@s todo tipo de vídeos. Na categoría de vídeo-facermos hai dende receitas de cociña ata vídeos sobre como quitar os puntos negros do nariz ou como facer pasta de dentes para elefantes. Na categoría de vídeo-opinarmos as persoas participantes falan de temas tan diversos como a praga da couza guatamalteca, o amor na rede ou o deporte adaptado, entre moitos outros. O xurado, composto por Manolo González, María Lado, Manuel N. Singala, María Yáñez e Pablo Lamosa xa comezou o seu traballo de visionado das pezas.

     

    Todo o mundo pode ser youtubeir@ porque tod@s temos algo que contar. Baixo esta premisa e para fomentar o acceso á videocreación, o programa Youtubeir@s impulsou dende decembro a abril máis de 20 obradoiros por toda Galicia impartidos pola produtora creativa Illa Bufarda.

     

    Youtubeir@s é unha iniciativa dos Servizos de Normalización Lingüística dos concellos de Ourense, A Baña, A Coruña, Ames, Carballo, Mazaricos, Pontevedra, Ribadeo, Santiago de Compostela, Teo e O Grove; e tamén das Universidades da Coruña, Santiago de Compostela e Vigo. Toda a

    información sobre o Concurso en www.youtubeiras.gal

     

    Para ampliar información

    www.youtubeiras.gal,

    https://www.facebook.com/youtubeiras/ https://www.youtube.com/youtubeiraseyoutubeiros

     
    Páxinas: 1 2 3 4 5 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica