CONTACTO

  • Carpichos espidos
  • os nosos fondos
  • Audi
  • Volver

    Ourense, 16 de decembro de 2020.-
     
    Un autobús musical itinerante no que actuarán Diego Nóvoa, Priscila e Broken Peach, a Mostra de Teatro Infantil, o Concerto de Reis e o belén de Arturo Baltar na Praza de San Cosmede e Damián son as principais propostas da programación deseñada pola Concellería de Cultura para o Nadal 2020, adaptada ás restricións derivadas da pandemia da COVID-19. Este ano non haberá Cabalgata de Reis, mais as súas maxestades faranlles chegar os caramelos á cativada nos propios centros educativos. Ademais, recibirán os nenos e as nenas no Auditorio o día 5 de xaneiro pola tarde.
     
    Belén de Baltar. Un ano máis, un dos máis fermosos reclamos do Nadal de Ourense será o belén de Arturo Baltar, na Praza de San Cosmede e Damián. Abrirá as portas o venres 18 de decembro, até o 6 de xaneiro, de 11:00 a 13:30 e de 17:30 a 20:30 (os días 25, 1 só pola tarde). O belén componse dunha gran cantidade de pezas feitas en barro cocido, ademais de curiosas representacións relixiosas e civís que, mesturadas, conxuntamente coas construcións de carácter popular, crean ese ambiente singular.

    Bus musical itinerante. Un autobús itinerante percorrerá as rúas da cidade para amenizar o Nadal, con actuacións de Diego Nóvoa, Priscila e Broken Peach. Diego Nóvoa é un emerxente músico ourensán que tivo na cidade a oportunidade de nacer, crecer e descubrir o seu talento e enfrontarse ao futuro que a vida tiña marcado no seu camiño: ser artista. Os tamén ourensáns Priscila amenizarán a cidade con versións de cancións clásicas de Nadal en formato de rock and roll acústico. Broken Peach é unha banda de rock e soul, que propoñen un espectáculo para públicos de todas as idades.

    Sábado 19, 18.30h - Diego Nóvoa 
    Domingo 20, 12.30 e 18:30h - Priscila 
    Martes 22, 12.30h - Broken Peach e 18.30 h - Priscila
    Mércores 23, 12:00 e 18:00h – Papá Noel + Priscila 
    Xoves 24, 12:00h - Papá Noel + Priscila
    Sábado 26, 12.30 e 18:30h - Broken Peach
    Sábado 2, 12.30 - Broken Peach e 18.30 - Priscila
    Domingo 3, 12.30 e 18:30h – Priscila 

    Teatro Infantil. O auditorio municipal acollerá catro funcións da Mostra de Teatro Infantil de Ourense, MOTI, que se presentará o vindeiro venres, e cuxo programa se estenderá desde o día 22 ao 30 de decembro.
    Recepción aos Reis Magos. As súas maxestades recibirán á rapazada da cidade o día 5 de xaneiro, no Auditorio, ás 16:00h. Nos próximos días informarase de como será a reserva de prazas

    Concerto de Reis. O sábado, 9 de xaneiro, no Auditorio, a cargo da Orquestra Clásica de Vigo. Nos seus 35 anos de historia as obras interpretadas cóntanse por centos, e nos últimos anos realizou propostas de danza, cine en directo, bandas sonoras, propostas actuais e obras consagradas. A Orquesta Clásica de Vigo non entende de estilos ou etiquetas na súa programación, que concibe como un espazo aberto de debate co que realizar novas propostas e atraer a públicos distintos aos da música clásica tradicional.

    Espazos expositivos. Tamén durante estas festas, o público poderá desfrutar destas cinco propostas:

    Museo Municipal: Os nosos fondos. A exposición contén obras de importantes mestres da pintura e da escultura ourensáns, que forman parte da colección de 1.306 obras de arte -pintura, escultura e debuxo- que se custodian no Museo.

    Museo Municipal, sala III: Reencontros e banalidades, de Bea Durán. Amosa 59 luscofuscos fotografados durante os 59 días de confinamento, no marco do estado de alarma iniciado o 14 de marzo.

    Sala Valente: Os caprichos espidos, Xosé Poldras, composta por 80 debuxos de grafito sobre papel, 12 linografías, imaxes do exemplar dos Caprichos de Goya custodiado no Museo de Pontevedra, a edición facsímil editada pola Universidade de Zaragoza, e textos explicativos da tese de doutoramento do autor.

    Claustro de San Francisco. Declarado Monumento Histórico-Artístico en 1923, o Claustro de San Francisco sobreviviu á súa azarosa historia conservando practicamente intacta a beleza dos seus 63 arcos, todos decorados con motivos vexetais, animais (reais e fantásticos) e humanos esculpidos en pedra. Obra de estilo gótico, con clara influencia románica.

    Centro comercial Ponte Vella: Construíndo o Universo dende Ourense, exposición polo centenario da creación da revista Nós. Composta por 12 paneis informativos que homenaxean a revista e a toda a xeración Nós.
     
    Ourense, 14 de Decembro de 2020.-
     
    O Auditorio Municipal programa para esta semana tres espectáculos de teatro, tanto para público adulto como para público infantil. Cumpre lembrar que esta semana se recupera a obra Rosalía que non se puidera celebrar o 29 de novembro. As persoas que dispuñan de entradas naquela data de entradas poderán facer uso delas e amais, debido a que se aumentou a capacidade para este tipo de espectáculos, haberá novas entradas a venta.
     
    - Xoves, 17 de decembro ás 20.30 horas
     
    SE FOSEN TURISTAS LEVARÍAN GAFAS DE SOL. LIMIAR TEATRO.
    Limiar Teatro convidanos a reflexionar sobre a memoria da emigración coa obra “Se fosen turistas levarían gafas de sol”.
     
    - Venres, 18 de decembro, as 18.00 horas
     
    ROSALÍA. Culturactiva
    Na Sala Principal do Auditorio Municipal, actúa a compañía Culturaactiva representando "Rosalía". A obra teatral está dirixida a público infantil e está inspirada na infancia da escritora galega. O prezo da entrada é de 3 €.
     
    - Domingo, 30 de decembro ás 12.00 horas
     
    CACHOPO MÁXICO. LILA TEATRO.
     “O Cachopo Máxico” é unha alegre interpretación do Nadal dende a perspectiva das costumes galegos máis antigas. Obra teatral dirixida a público infantil/familiar.
     
    Entradas en ataquilla.com, no teléfono 902 504 500, na Sede de Afundación (Praza Maior, 4) e na billeteira do Auditorio dúas horas antes da función.
     
     
    Ourense, 10 de decembro de 2020.-
     
    O Concello de Ourense abre ao público dende hoxe a exposición “Reencontros e banalidades”, o proxecto fotográfico da ourensá Beatriz Durán, na sala III do Museo Municipal. 
     
    A presentación deste proxecto expositivo ten un interese temporal, posto que amosa 59 luscofuscos fotografados durante os 59 días de confinamento, no marco do estado de alarma iniciado o 14 de marzo de 2020 a razón dunha pandemia global que aínda, a día de hoxe, seguimos sufrindo.
     
    O alcalde de Ourense, Gonzalo Jácome, e a artista visitaron esta mañá a mostra, que desde hoxe se pode visitar no Museo Municipal
    Beatriz Durán, ourensá sensibilizada dun xeito moi especial, pola súa dedicación profesional, coa educación especial, formúlanos un proxecto solidario para así axudar a quen está sufrindo as consecuencias da pandemia, individual e colectivamente.
     
    Este proxecto ten como finalidade amosarlles apoio e comprensión a aquelas persoas que o viviron dende a soidade, ás que sufriron problemas de saúde e as viviron outras situacións complexas.
     
    Amais, este proxecto ten unha finalidade solidaria ao destinar a recadación das obras, simbólica, á Asociación Española Contra o Cancro.
     
    · Teatro e exposicións conforman a oferta cultural municipal

    · A exposición 'Construíndo o universo desde Ourense' trasladase desde mañá martes á terraza do centro comercial Ponte Vella

    Ourense, 07 de Decembro de 2020.-

    O Concello de Ourense propón teatro para todos os públicos dentro da oferta cultural desta semana. O mércores e o venres, orientado cara a un público adulto, o domingo cara ao infantil. 

    O mércores, 9 de decembro, ás 20.30h, na sala principal do Auditorio Municipal de Ourense, actuarán Ainé producións representando a obra O Montacargas.
    O venres, 11 de decembro, ás 20.30h, na sala principal do Auditorio Municipal de Ourense actuarán Estudo Momento representando a obra 1879, Casa de Bonecas.

    Para o domingo, 13 de decembro, ás 12.00h, actuarán Café de las Artes Teatro representando A inesquecible viaxe de Nana. Esta obra teatral está destinada a nenos e nenas. Entrada: 3 euros

    Toda a información sobre os espectáculos: www.ourensecultura.gal 

    Actualmente, o aforo máximo permitido é de 160 persoas, gardando todas as medidas de hixiene persoal -máscara para a boca, lavado de mans con xel hidroalcohólico, etc-. As entradas pódense adquirir en ataquilla.com, no teléfono 902 504 500, na Sede de Afundación (Praza Maior, 4) e na billeteira do Auditorio dúas horas antes da función.

    Construíndo o universo desde Ourense

    A exposición 'Construíndo o universo desde Ourense' segue o seu camiño: logo de pasar pola rúa do Paseo e pola Biblioteca Pública Nós, poderase visitar desde mañá martes na terraza do centro comercial Ponte Vella. A exposición explica, a través de 12 paneis, o que significou a Revista Nós, da que se cumpre o centenario. Un movemento que transcende o cultural, pois tentou modernizar Galicia, dignificar a súa cultura e as súas xentes. Está impulsada pola Fundación Vicente Risco e organizada polo Concello de Ourense a través da Concellería de Cultura.
     
     
    Ourense, 5 de decembro de 2020.-
    O Museo Municipal presenta o catálogo da exposición colectiva 'Os nosos fondos', a colección de arte privada que custodia o Concello. O documento  pódese consultar en liña na páxina web da Concellería de Cultura: ourensecultura.gal [enlace], e desde mediados de mes estará a disposición no Museo.
     
    A exposición, de carácter permanente, contén importantes mestres da pintura e da escultura ourensáns, caso de Prego de Oliver, Cándido Fernández Mazas, Luis Trabazo, Xaime Quesada, Antonio Quesada, Virxilio Fernández, Acisclo Manzano, Manolo Buciños, Xosé Cid, Vidal Souto, ou Alexandro, entre outros. Forman parte da colección de 1.306 obras de arte -pintura, escultura, debuxo...- que se conservan e custodian no Museo Municipal de Ourense. 
     
    O Museo abre no seguinte horario: de martes a sábados, de 11:00 a 13:30 horas e de 18:30 a 21:30 horas; os domingos, de 11:00 a 13.30 horas; os luns permanece pechado.
     
    No centenario da Revista Nós, no que se lle rende homenaxe ao traballo do grupo de intelectuais e a un dos proxectos culturais colectivos máis singulares e universais que desenvolveu na cidade de Ourense, a exposición 'Construíndo o universo desde Ourense' segue o seu camiño: logo de pasar pola rúa do Paseo e pola Biblioteca Pública Nós, a exposición poderase visitar desde este martes na terraza do centro comercial Ponte Vella.
     
    A exposición explica, a través de 12 paneis, o que significou a Revista Nós, da que se cumpre o centenario. Un movemento que transcende o cultural, pois tentou modernizar Galicia, dignificar a súa cultura e as súas xentes. Está impulsada pola Fundación Vicente Risco e organizada polo Concello de Ourense a través da Concellería de Cultura.

    Imaxe da obra "Chuvia", de Alexandro González Cruz.
     
     
    Ourense, 01 de Decembro de 2020.-
     
    A Concellaría de Cultura, do Concello de Ourense, programa o espectáculo de Rosalía, representado pola compañía Culturaactiva, para o vindeiro venres, 18 de decembro, ás 18.00 h. 
     
    A obra teatral, dirixida a tódolos públicos, representarase na Sala Principal do Auditorio Municipal. As entradas, a tres euros, xa están dispoñibles en ataquilla.com. Ataquilla.com está a contactar coa xente que xa tiña entradas reservadas para verificar se queren devolución ou reserva para a nova data.
     
     
    Ourense, 30 de novembro de 2020.-
     
    O Concello de Ourense presenta a súa oferta cultural para o último mes do ano, que se inicia cun concerto da Real Filharmonía de Galicia este mesmo xoves, 3 de decembro. O acto, dentro do ciclo lírico anual Enclave de Cámara, estará dirixido por Maximino Zumalave e o seu programa estará baseado en obras de Ludwig Van Beethoven.
     
    A oferta do Auditorio municipal para este mes de decembro inclúe danza (a cargo de Javier Martín), teatro para adultos e a clásica programación infantil dos domingos pola mañá para os máis pequenos.
     
    Actualmente, o aforo máximo permitido é de 50 persoas, gardando todas as medidas de hixiene persoal -máscara para a boca, lavado de mans con xel hidroalcohólico, etc-. As entradas pódense adquirir en ataquilla.com, no teléfono 902 504 500, na Sede de Afundación (Praza Maior, 4) e na billeteira do Auditorio dúas horas antes da función.
     
    Xoves 3 decembro | 20.30 h | Todos os públicos
    REAL FILHARMONÍA DE GALICIA, dentro do ciclo Enclave de Cámara
    A Real Filharmonía de Galicia inicia o seu camiño en Santiago de Compostela en 1996. Actualmente está formada por cincuenta músicos de 17 nacionalidades diferentes. Maximino Zumalave dirixirá o conxunto no concerto de Ourense.
     
    Programa:
    - Ludwig Van Beethoven (1770/1827) | Obertura Coriolano, op. 62 (1810)
    - Ludwig Van Beethoven (1770 - 1827) | Sinfonía nº 3 en Mi bemol Maior 'Heroica', op. 55 (1803)
    - Allegro con brio | Marcia funebre: Adagio assai | Scherzo: Allegro vivace | Finalle: allegro molto.
     
    Sábado 5 decembro | 19 h | Todos os públicos
    SOMA (Danza), de Javier Martín e Joaquín Jara. 
    SOMA é unha experimentación escénica e matérica que se concentra no estudo do corpo e do movemento como sombra e fragmento. A medida e o peso son expresión da súa potencia e desaparición, a súa necesaria brecha e abismo. Un saír do rito. Instalación e performance bailada, escultor e iluminador comparten, transitando por diferentes estados físicos, conceptos estéticos e calidades de movemento, relacionándose e achegando roles mediante esculturas, materiais, ambientes, obxectos e coreografías que se van despregando nun espazo conformado ante o espectador.
     
    Domingo 6 decembro | 12 h | Todos os públicos
    LAMBETADAS, de Talía Teatro. 
    Unha lambetada é un doce, algo saboroso, que se come por gusto. Pero tamén é a acción de pasar a lingua buscando un efecto agradable. Partindo da dobre acepción da palabra elaboraremos un doce e gorentoso espectáculo teatral, pasando a lingua a modo, con deleite, sobre unhas historias que nos deixarán un doce sorriso nos beizos.
     
    9 decembro | 20.30 h | Público adulto
    O MONTACARGAS, de Ainé Producións. 
    O Montacargas é una obra teatral escrita nun só acto por Harold Pinter en 1957 e que foi enmarcada polo teórico Martin Esslin dentro da corrente dramática teatro do absurdo. A historia narra a situación de dous homes (Ben e Gus) que están encerrados nun cuarto, nunha estancia miserablemente amoblada. A historia avanza cando comezan a chegar mensaxes a través dun montacargas que semellan ser unha forma de comunicación de persoas que habitan na parte superior da estancia na que se atopan.
     
    Venres 11 decembro | 20.30 h | Público adulto
    1879, CASA DE BONECAS, de Estudo Momento. 
    Adaptación do texto clásico de Henrik Ibsen, estreado con grande escándalo a finais do século XIX. Predecesora dos grandes movementos feministas, enxalza a figura de Nora Helmer, esposa e nai perfecta, que rachará dun famoso "golpe de porta" con todas as ataduras do sistema patriarcal. Esta versión, centrada no matrimonio ao que lle dan vida os actores Iria Ares e Xoán Carlos Mejuto, convida o espectador a recoñecerse na intimidade dunha relación desigual entre homes e mulleres, como se se estivese a ver todo a través dunha ventá indiscreta...
     
    Domingo 13 decembro | 12 h | Todos os públicos 
    O CACHOPO MÁXICO, de Lila Teatro.
    Nunha pequena porción de terra enriba dun monte que non se atopa en ningún mapa por ser demasiado pequeno, pódese divisar unha casiña humilde e fermosa. Alí vive unha familia moi singular ao tempo que bastante plural. É a familia Palpatore, son extraordinarios e teñen aspectos moi diferentes entre si. Tamén, coma todas as familias, gardan grandes segredos. Ao achegarse o Nadal, a familia Palpatore comeza a ferver. Toca traballar sen descanso durante todo un mes e non están afeitos a tanta velocidade. É unha alegre interpretación do Nadal dende a perspectiva dos costumes galegos máis antigos.
     
    Xoves 17 decembro | 20.30 h | Todos os públicos
    SE FOSEN TURISTAS LEVARÍAN GAFAS DE SOL, de Limiar Teatro. 
    A memoria é un arma que se dispara sen querer. Recordamos, esquecemos. A memoria é múltiple, diversa. Nada hai máis democrático e tirano que a memoria. Memoria individual, íntima, secreta, memoria colectiva. A memoria é un espello que non deixa ver o presente pero proxecta o noso futuro. Hoxe é memoria do mañá, futuro do onte. Somos un produto dun espazo, dun tempo, dunha memoria. O ser humano loitou dende sempre por controlar o espazo, por reconstruír a memoria... pero o tempo se escapa entre os seus dedos.
     
    Domingo 20 decembro | 12 h | Todos os públicos
    A INESQUECIBLE VIAXE DE NANA, de Café de las Artes Teatro. 
    Nana está grávida e pouco a pouco descobre como o seu corpo comeza a cambiar para xa nunca volver a ser unha, se non dúas. Nana ten a sensación de subir a un globo aire quente e camiñar polo aire durante nove meses. E máis. O seu bebé nacerá, farase neno, mozo, adulto e pai. A inesquecible viaxe de Nana, unha viaxe en globo que sobrevoa o terreo insondable do ciclo da vida.
     
    Ourense, novembro de 2020.-
     
    O Concello de Ourense propón, para esta semana, unha axenda repleta de música, coa volta do ciclo lírico, e teatro para nenos e nenas. 

    O sábado, 28 de novembro, as 18.00h, na Sala Principal do Auditorio Municipal actúan “Os Bolechas”. A obra está dirixida a nenos e nenas. A entrada é gratuíta, até completar aforo.
     
    O domingo, 29 de novembro, as 12.00h, na Sala Principal do Auditorio Municipal, actúa a compañía Culturaactiva representando "Rosalía". A obra teatral está dirixida a público infantil. O prezo da entrada é de 3 €.
     
    Asemade, os días 25. 26 e 27 de novembro celebrarase o V Ciclo Lírico da Cidade de Ourense (programa en PDF).
     
    ----------
    Durante esta semana tamén se poderá acceder a diferentes espazos expositivos e exposicións:
     
    · Espazo expositivo de Arturo Baltar
     
    · Claustro de San Francisco
     
    · Museo Municipal: “Os nosos Fondos”, colección do Museo Municipal de Ourense
     
    · Praza da República, entrada Biblioteca Nós: “Construíndo o Universo dende Ourense”, exposición itinerante polo centenario Nós.
     
    · Sala Valente: “Os caprichos espidos”, Xosé Poldras.

    O aforo máximo é de 30 persoas, sempre coas preceptivas medidas sanitarias -máscara de protección e hixiene de mans á entrada-. 
    As entradas poden mercarse en ataquilla.com ou na propia billeteira do Auditorio dúas horas antes da función.
     
    Máis información na web de Cultura do Concello de Ourense.
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica