CONTACTO

  • Audi
  • I. Tascón
  • prem lit
  • MMOu
  • EdC
  • Volver

    Ourense, 14 de febreiro de 2020.-
     
    A compañía galega Matarile Teatro presentará mañá, sábado, 15 de febreiro ás 20:30 horas no Auditorio a súa nova obra: Daimon y la jodida lógica, un espectáculo de grande formato, cun equipo de 14 persoas, con 9 intérpretes e 4 músicos, en que mistura teatro, danza e música en escena. 
    O concelleiro de Cultura, Mario González, e a directora Ana Vallés, presentaron esta mañá esta nova creación da compañía galega, que acadou un grande éxito no festival internacional de outono de Madrid, e que percorrerá durante o ano 2020 diferentes cidades españolas: comezando por Ourense, para continuar logo en Santiago, Valladolid, Xixón e Murcia.
     
    O título da obra Daimon y la jodida lógica alude a un concepto mitolóxico que pode significar, segundo o contexto, “o destino, a voz da conciencia, a intuición... Unha presenza oculta, imprevisible que determina actos e decisións que non podemos explicar racionalmente”, en palabras da autora e directora da obra.
    Compañía dirixida por Ana Vallés e Baltasar Patiño, Matarile conta cunha traxectoria de 33 anos adicados á creación dun teatro que se caracteriza pola innovación, enmarcada nas artes escénicas contemporáneas-
     
    As entradas, desde 8 euros, pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e na despacho de billetes do Auditorio dúas horas antes da función.
     
    Ourense, 12 de febreiro de 2020
     
    Máis de 2.000 persoas visitaron até hoxe a exposición Retrospectiva, que recolle medio cento de obras de Carmucha Vázquez Prats que percorren a súa obra e resumen a súa vida pictórica. Esta mañá tivo lugar a presentación do catálogo desta exposición, que está aberta ao público até o domingo na Sala Valente. A artista expresou a súa ledicia e agradecemento polos resultados da mostra, tanto pola afluencia de público, que cifrou en máis de 2.000 persoas, como polo apoio recibido por parte do Concello, polo equipo da Sala Valente e pola calidade do catálogo.
     
    A mostra foi un éxito tremendo, en palabras da directora de espazos expositivos do Concello, Eva Torres, quen subliñou que Vázquez Prats é unha artista que vive da sala, da súa obra e da súa xente, xa que foi partícipe da exposición constantemente, coa súa presenza na propia sala. 
     
    Pola súa banda, o concelleiro de Cultura, Mario González destacou a calidade da mostra que, recoñeceu, visitou en moitas ocasións “sacándolle todo o xugo a Carmucha, que nos contou toda a súa historia, e incluso pequenas anécdotas que estaban escondidas detrás destes cadros”, subliñando que foi un pracer coñecer a Vázquez Prats, como artista e como persoa. Tamén puxo en valor a achega da Sala Valente á programación cultural da cidade: “seguimos traballando neste marabilloso espazo, que é un pulmón de cultura para a cidade, e seguiremos apoiando o traballando o traballo dos artistas de Ourense”.

    Carmucha Vázquez Prats
    Muller adicada á pintura dende nena, Vázquez Prats é un exemplo de constancia, traballo e implicación artística. Fixo a súa primeira exposición nos anos 50, e desde aquela realizou continuas mostras a nivel nacional e internacional. Vázquez Prats procede a pinceladas curtas, case unánimes, que van compoñendo con pequenos fragmentos de cor a paisaxe estremecida da súa pintura. Son pinceladas sinxelas, mais sinceras e alleas ao efectismo fácil, que se esparexen polo fondo do cadro coa mesma minuciosidade de procedemento que cando tocan a figura protagonista. 
     
    A mostra pódese visitar até finais desta semana: o sábado, de 13.30h e de 18.30h a 21.30h e os domingos de 11h a 13.30h. 
     
    Ourense, 10 de febreiro de 2020.-

    As compañías de teatro Matarile e Sarabela presentan esta fin de semana, no Auditorio de Ourense, as súas propostas teatrais dirixidas ao público adulto e infantil, respectivamente. Será dentro dunha programación cultural que comeza o venres coa presentación do novo disco d'A Banda da Loba.
    As entradas para os tres eventos pódense adquirir en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio dúas horas antes de cada función.
     
    Venres 14 de febreiro, 20:30 horas. 6 euros. Todos os públicos.
    A BANDA DA LOBA. Presentación do disco Fábrica de Luz (2019)

    Despois do éxito acadado co seu primeiro disco, Bailando as rúas (2017), a banda estradense presenta o seu segundo traballo, Fábrica de luz Fábrica de Luz (2019), composto por doce cancións que prometen non deixar a ninguén indiferente. É un traballo de creación, reflexión e homenaxe en torno á idea de nai entendida nun sentido amplo. A lingua e a terra, son as primeiras nais, fábricas de luz. As creadoras que nos precederon e as que nos acompañan nesta viaxe son tamén fábricas de luz. As nosas nais, as vosas nais, todas as nais son fábricas de luz. Son fogar, tempo e amor incondicional. Son poder, loita e memoria. Son todo o que nos permite ser hoxe tamén fábrica de luz.
     
    Sábado 15 de febreiro, 20:30 horas. 8 euros. Público adulto.
    DAIMON Y LA JODIDA LÓGICA, de Matarile Teatro

    Anxo ou demo, o murmurio da voz interior que detén ou empurra. Significado que podemos interpretar pero non comprender. Alma, animal interior: profundo, fatal, opaco. Presenza oculta, imprevisible, que determina actos e decisións que non podemos explicar racionalmente. Ás veces agochado e ás veces por diante dous pasos. Ocúpanos,acompáñanos,céganos,impúlsanos. Entra aínda que pechemos a porta. Dirección de Ana Vallés. 
     
    Domingo 16 de febreiro, 12:00 horas. 3 euros. Infantil (5-12 anos).
    PROXECTO NOÉ, de Sarabela Teatro

    Tres pingüíns, o diluvio universal e dous únicos boletos para a arca de Noé son os elementos desta historia narrada cunha linguaxe sinxela e contundente.
    Os pingüíns reflexionan sobre a natureza, sobre o valor da amizade: como facer para salvarse os tres cando só teñen dúas pasaxes? Cando está permitido e cando non romper as regras? Que xustifica facelo?
     
    Ourense, 6 de febreiro
     
    O Auditorio Municipal de Ourense programa para esta fin de semana tres espectáculos: teatro para bebés, mañá, venres, en dobre sesión (18:00 e 19:00 h) con Levántate Xan, danza para público adulto, o sábado, con Sin título 97/17, de Sil produccións (20:30 h), e teatro infantil na cita dos domingos pola mañá (ás 12:00 h), con Segundo caviloso. As entradas para estes dous últimos espectáculos pódense adquirir a través da páxina web www.ataquilla.com, na sala de exposicións de Afundación na Praza Maior e o no despacho de billetes do Auditorio dúas horas antes da función. 
     
    Levántate Xan: Contos para bebés é un espectáculo para nenos e nenas de ata 6 anos, que A Trastenda dos Contos representará o venres, 7 de febreiro na Sala Apego, en dobre sesión,  ás 18 e 19 horas. Son 30 minutos de historias, xogos e cantigas na que os animais da granxa son os verdadeiros protagonistas. A entrada é gratuíta e cada menor debe acudir coa compañía dunha persoa adulta.
     
    O sábado, 8, o dúo formado por Mikel Aristegui e Masako Hattore reestrearán o espectáculo Sin Título 97/17, ás 20:30 horas. O dúo foi creado en 1997, xunto con Marcela San Pedro, a partir da invitación da asociación “Artistes Face au SIDA” para participar nunha gala do día internacional da loita contra a SIDA, o 1 de decembro, na Sala Patiño de Ginebra, nunha época durante a cal as asociacións de loita contra a enfermidade comezaban a facerse visibles na paisaxe europea. Ourense recibe esta reinterpretación do dúo, tendo en conta o novo entorno desenvolvido nestes últimos 20 anos. Sin título 97/17 é unha declaración de amor”, asegura a compañía. Entradas desde 5 euros
     
    A terceira cita será o domingo, ás 12:00 h, con Segundo caviloso, de Lila teatro. Segundo Caviloso é especialista en artes marcianas. Desde a súa máis tenra infancia sentiuse atraido polos números e non pode deixar de contalo todo. A máxima na súa vida é resolver grandes enigma e pasa o tempo coma verdadeiramente lle gusta: cavilando. Mentres reflexiona sobre os seus asuntos é capaz de voar entre ecuacións e fórmulas imaxinarias con solucións improbables. Segundo atrévese con todo, mesmo cunha clase maxistral de física cuántica aplicada sobre superficies peludas. As entradas, desde 3 euros en ataquilla.com.
     
    Ourense, 6 de febreiro de 2020.-
     
    O Concello reforza a programación do Entroido de Ourense 2020 coa finalidade de potenciar a súa dimensión de Entroido líder no Noroeste peninsular. Así o anunciou esta mañá o alcalde, Gonzalo Pérez Jácome, que presentou a programación de actividades xunto ao concelleiro de Cultura, Mario González e representantes dos Entroidos da cidade: As Pitas de Eiroás, Paquita e Nicanor de Seixalbo e Frei Canedo da Ponte.
     
    Como principal novidade, o Entroido de Ourense (13 ao 26 de febreiro) contará por primeira vez con 3 desfiles. Xunto ao tradicional de comparsas e carrozas do domingo, 23 de febreiro, incorpora un desfile infantil (venres, 21, 12.00 h) no que participarán 1.300 escolares da cidade, e un desfile dos Entroidos da cidade (o mesmo día, ás 20:30 h), que percorrerán as rúas e prazas da zona vella da cidade.
     
    Tamén se reforza a programación coa actuación de orquestras (catro en total: o sábado, o domingo, o luns e o martes) na Praza Maior, ademais das actividades de animación de rúa, o pregón de Moncho Borrajo, as sesións de DJ´s, as festas e actividades infantís ou a elección do Rei ou Raíña do Entroido, o Enterro da Sardiña e as actividades propias dos entroidos da Ponte, Seixalbo e As Eiroás. 
     
    O Concello editou 40.000 exemplares coa programación do Entroido 2020, que fará chegar nos próximos días aos domicilios de toda a cidade.
    “Vai ser un excelente Entroido de cidade”, asegurou o alcalde de Ourense, quen lembrou que a nosa é “indubidablemente a cidade galega e do noroeste de España co mellor entroido que hai. Non hai ningunha cidade que poda competir con nós e esperamos seguir liderando ese ránking”, afirmou.
     
    Destacou as melloras da programación -a primeira, lembrou, que organiza este goberno municipal-, subliñando aspectos como os dous novos desfiles ou as actuacións de orquestras na Praza Maior o domingo e o martes, así como a “forza cada vez maior” que están a adquirir os entroidos da cidade. “O Entroido de Ourense vai cada vez a máis e é o que esperamos para este ano”, asegurou Pérez Jácome. 

    Concurso de comparsas.
     
     
    Ourense, 03 de febreiro de 2020.-
     
    A cita do mes de febreiro co Enclave de Cámara, este xoves 6 de febreiro ás 20:00 horas no Liceo de Ourense, reunirá dous dos músicos máis talentosos do panorama internacional da música clásica: Isabel Villanueva (viola) e François Dumont (piano). As entradas pódense adquirir en ataquilla.com ou no propio espazo, dúas horas antes da función.
     
    Isabel Villanueva (viola) é unha das violistas máis importantes da nova xeración. Actuou como solista con orquestras en Europa, Rusia, Medio Oriente e China. Ela é pioneira na presentación de concertos en numerosos lugares onde a viola nunca fora programada como solista. En 2013 converteuse na primeira violista estranxeiras en realizar recitais en Irán. Está particularmente involucrada na nova música colaborando con compositores e obras escénicas, moitas dedicadas a ela, por S.Gubaidulina, M.Sotelo, G.Khayam, J.Cervelló, H.Khoury, T. Marco, J.Zárate e B. Olivero, entre outros. 
     
    Bohèmes, o seu primeiro álbum, foi gravado xunto a François Dumont en outubro de 2017 e recibiu premios de The Strad, Melómano de Ouro, Scherzo Magazine, Top 10 RITMO Magazine, e en 2018 foi galardoado co Mellor Álbum Clásico do Ano nos Premios MIN de Música Independente.
     
    En 2015 recibiu o recoñecemento institucional de Marca España como “embaixadora do talento español no mundo”. Ese mesmo ano recibiu o Premio “El Ojo Crítico” de Música Clásica da Corporación Nacional de Radiodifusión Española (RNE), e recentemente en 2019, recibiu o Premio de Cultura da Comunidade de Madrid en Música Clásica; é a primeira vez que ambos os dous premios se lle outorgan a unha violista.
     
    François Dumont (piano) é gañador dos máis prestixiosos premios internacionais: o concurso Chopin, o concurso Raíña Elisabeth, o concurso Clara Haskil e o concurso de Montecarlo. Foi nomeado para un Grammy na categoría ‘solo instrumental’ e recibe o premio dos “Críticos da Música” como Revelación Francesa.
     
    Actuou coa Orquestra Nacional de Lión e Leonard Slatkin (con quen gravou os dous concertos de Ravel), coa Orquestra de Cleveland, a Orquestra do Teatro Mariinsky, a Orquestra Filharmónica de Montecarlo, a Orquestra Filharmónica de Varsovia, a Sinfónica de Toquio, a Orquestra de Cámara de Lausana con directores como Jesús López -Cobos, Antoni Wit, Arie van Beek, Philippe Bender e Stefan Sanderling, entre outros.
     
    François Dumont ofreceu recitais no Festival de La Roque d’Anthéron, o Festival Piano aux Jacobins de Toulouse, o Festival Chopin en Nohant, Festival de Radio France Montpellier, Festival de Besançon, Festival Chopin en Bagatelle, Nuits du Suquet en Cannes, Festival de Varsovia, Ravel Montfort l’Amaury, Festival de Ljubljana en Eslovenia, Kennedy Center de Washington. Tamén é invitado regularmente a China e Xapón.
     
    PROGRAMA
     
    I Parte
    Ludwing van Beethoven (1782-1827) | Sonata en La maior, Op. 69 n.º 3 para cello e piano (versión viola) [26’]
    Allegro | Scherzo: Allegro molto | Adagio cantabile – Allegro vivace

    II Parte
    Mijaíl Glinka (1804-1857) | Sonata en La menor para viola e piano [17’]
    Allegro moderato
    Serguéil Prokókiev (1891-1953) | Cinco pezas do ballet “Romeu e Xulieta” (arr. Borissovsky) [26’]
    Allegro moderato | Introdución | A moza Xulieta | Danza dos cabaleiros | Morte de Xulieta | Mercutio
     
    Ourense, 31 de xaneiro de 2020.-
     
     
     
     
    O Entroido 2020 xa está en marcha na cidade coa convocatoria do Concurso de Comparsas e da Elección do Rei-Raíña, cuxas bases publica a Concellería de Cultura no seu espazo web e que están abertas a asociacións de veciñas e veciños, culturais ou xuvenís, grupos, colexios, etc. Repartiranse 18.000 euros en premios entre os participantes no desfile, que terá lugar o vindeiro domingo, 23 de febreiro. Para o Rei-Raíña do Entroido, un xurado valorará a orixinalidade, a chispa diante do público, o vestiario e a creatividade.
     
    Os premios por categorías serán os seguintes:
     
    Rei - Raíña 600 €
     
    Comparsas con máis de 10 compoñentes.-
    1º premio 900 €
    2º premio 700 €
    3º premio 500 €
     
    Comparsas con menos de 10 compoñentes.-
    1º premio 400 €
    2º premio 300 €
    3º premio 200 €
     
    Especiais Comparsas.-
    A máis numerosa 300 €
    A máis ocorrente ou graciosa 300 €
    Mellor animación / musical 300 €
     
    Carrozas.-
    Mellor deseño 300 €
    Mellor animación 300 €
     
    A Concellería de Cultura tamén prevé axudas para todos os participantes que completen o desfile e non acaden ningún premio. As carrozas recibirán 120 € cada unha pola súa participación; as comparsas de 5 a 9 compoñentes 60 €, de 10 a 19 compoñentes 90 €, de 20 a 29 compoñentes 120 €, de 30 a 39 compoñentes 150 €, de 40 a 49 compoñentes 180 €, de 50 compoñentes en adiante 210 €. 
     
    As inscricións das carrozas e/ou comparsas faranse a través do Rexistro Xeral do Concello e mediante os modelos de inscrición oficiais. No caso de Asociacións ou Entidades a inscrición farase a través de Sede Electrónica.
     
    O prazo de inscricións de carrozas e comparsas, así como para participar no concurso de Rei - Raíña remata o martes 18 de febreiro ás 14:00 horas.
     
     
    Ourense, xaneiro de 2019.-
     
    O artista Moncho Borrajo (Baños de Molgas, 1949) será o encargado de abrir as festas do Entroido na cidade. Será desde a Praza Maior o vindeiro sábado, 22 de febreiro, ás 20:30 horas, e introducirá o primeiro dos concertos gratuítos das festas, a cargo da orquestra Los Satélites -desde as 21:30 horas-. O de Moncho Borrajo será un pregón diferente: terá moito de actuación teatral impregnada de moito sentido do humor.
     
    A última vez que puidemos ver o artista ourensán na cidade foi o pasado mes de outubro, co seu espectáculo A pelo no Auditorio municipal.

    Información relacionada #Entroido2020: Concurso de comparsas e Rei/ Raíña.
     
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica