CONTACTO

  • Expo Nós
  • os nosos fondos
  • yout
  • Audi
  • I. Tascón
  • Volver

    Ourense, 3 de marzo de 2020
     
    O Auditorio Municipal de Ourense programa para esta semana citas co teatro para bebés, coa popular historia “A toupiña que quería saber”, e coa música rock para todas as idades, con Remember Queen, o mellor espectáculo tributo á exitosa banda británica que lideraba Freddie Mercury.
     
    Na primeira das citas, o venres, 6 de marzo, Xanela do Maxín representará “A Toupiña que quería saber”, nunha dobre sesión (ás 18:00 e 19:30 horas), da man do programa Apego. Unha simpática e escatolóxica historia, que asegura gargalladas para todos os públicos. Está dirixida a criqanzas desde os 2 anos, que deberán acudir acompañadas por algunha persoa adulta.
     
    O sábado, 7, ás 21:00 horas chegará ao Auditorio unha nova tempada do espectáculo “Remember Queen”, que desde 2005 triunfa nos mellores escenarios de toda Europa, no que xa leva acumulados máis de 500.000 espectadores e espectadoras. 
     
    Os artistas en Remember Queen coidan o máis mínimo detalle da actuación, cunha posta en escena similar á que Quee utilizaba na Xira do 86, a última que realizaron con Mercury en escena. Repasarán as cancións máis populares do grupo nun espectáculo que lidera o mellor dobre do mundo de Freddie Mercury, o italiano Piero Venery, que ofrece unha impecable caracterización do artista. 
     
    As entradas para estes espectáculos (desde 3 e 18 euros, respectivamente) pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e no despacho de billetes do Auditorio dúas horas antes da función.
     
     
    Ourense, 26 de febreiro de 2020
     
    A compañía galega Ibuprofeno Teatro presenta mañá, xoves, no Auditorio de Ouense (20:30 h) a súa nova montaxe O mel non caduca, unha traxicomedia arredor da obsolescencia programada, da relación do ser humano cos obxectos e a degradación ecolóxica do planeta por mor da perversa lóxica capitalista, do crecemento e do consumo masivo de produtos. Unha obra, di a compañía, “para emocionar e concienciar e tamén para rir e emocionar”. As entradas, desde 3 euros, pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e no despacho de billetes do Auditorio dúas horas antes da función.
     
    Ibuprofeno teatro é unha compañía privada formada por Santiago Cortegoso e Marián Bañobre, dous profesionais que -despois de anos de traxectoria en numerosas compañías galegas e foráneas- promoveron en 2010 o seu propio selo de produción, para emprender proxectos teatrais dun xeito persoal e independente, nos que integran a escrita dramática no mesmo proceso de creación e posta en escena das obras. O texto e a dirección son de Santiago Cortegoso, a interpretación de Marián Bañobre e Avelino González.
     
    O mel non caduca ten forma de collage en todos os sentidos: temático, estético e na linguaxe, con 2 tramas que se complementan con outros textos (monólogos e diálogos), e con escenas xestuais e de movemento escénico en relación coa versatilidade do espazo escénico, composto por colmeas e outro material de apicultura. 
     
    Dous científicos/apicultores, en 2173, levan a cabo sofisticados e absurdos experimentos, nun contexto de futuro distópico no que o planeta está arrasado. Tratan de crear sinteticamente unha abella a partir do último tarro de mel que se conserva na historia. Dous irmáns volven á casa familiar na aldea pola morte da súa nai. O conflito aflora cando deben xestionar as pertenzas familiares. O máis vello quere vendelo todo, a máis nova entra nunha crise vital porque se debate entre a súa acomodada vida nunha cidade e a nostalxia que lle produce volver entrar en contacto cos obxectos e os recordos que marcan a súa historia vital.
     
    Máis información en www.ibuprofenoteatro.com
     
    Ourense, febreiro de 2020.-
     
    Comparsas con menos de 10 compoñentes:
     
    1.- La boda del año (400€)
    2.- Arlequíns venecianos (300€)
    3.- Asociación de persoas xordas de Ourense (200€)
     
     
    Comparsas con máis de 10 compoñentes 
     
    1.- Piratas del Caribe (900€)
    2.- Estrelas da noite (700€)
    3.- Gran circus Ben-Cho-Shey (500€)
     
    Premio especial á comparsa máis numerosa: Leticia Nogueira Pérez (300€)
    Premio especial á comparsa máis ocorrente ou graciosa: Ourenpark (300€)
    Premio especial á comparsa con mellor animación musical: Bicos no vento (300€)
    Premio ao mellor deseño: Loucos por voar (300€)
    Premio á mellor animación: El gran showman (300€)
     
     
    Raíña do Entroido
     
    A carballiñesa María Muleiro foi elixida esta tarde Raíña do Entroido de Ourense 2020. O premio ten unha dotación económica de 600 euros
     
     
     
    Ourense, 19 de febreiro de 2020.-
     
    O desfile de Entroido, que terá lugar o vindeiro domingo 23 de febreiro, contará coa participación de 57 comparsas e 17 persoas que competirán polo trono de Rei / Raíña doas festas. Foron as inscricións recibidas na Concellería de Cultura até o día de onte, no que se pechaba o prazo. 
     
    O departamento de Cultura repartirá 5.100 euros en premios: 600 euros para o Rei ou Raíña; 900 euros para a mellor comparsa de máis de 10 compoñentes (700 e 500 euros para a segunda e terceira, respectivamente); 400 euros para a mellor comparsa de menos de 10 compoñentes (cun segundo premio de 300 euros e un terceiro de 200 euros); así como premios especiais para comparsas (300 euros para a máis numerosa, 300 para a máis ocorrente ou graciosa, e 300 euros para a mellor animación musical). Tamén haberá  premios para o mellor deseño de carrozas e para as máis animadas (ambos de 300 euros).
     
    Desfile infantil
    Pero os desfiles de Entroido comezarán antes: o vindeiro venres, 21de febreiro,  levarase a cabo o I Desfile Escolar de Entroido, unha iniciativa conxunta das áreas de Educación e de Cultura coa colaboración da Policía Local e de Protección Civil. 
     
    Participarán máis de 1.300 alumnos e alumnas de 3 a 16 anos dos seguintes centros de ensino da cidade: CEIP Curros Enríquez, CEIP As Mercedes, CEIP Manuel Luís Acuña, CEE O Pino, CPR La Purísima e o CPR Divina Pastora.
     
    Ademais, tres charangas amenizarán este evento no que se poderán ver personaxes de distintas épocas e civilizacións. 
     
    A saída será ás 12:00 horas da Praza Maior, e percorrerá as rúas de Valentín Lamas Carvajal, do Paseo, de Bedoya, de Santo Domingo, Praza do Ferro, e rúa da Paz. O regreso á Praza Maior está previsto para as 13:00 horas.
     
     
    Ourense, 18 de febreiro de 2020.-
     
    A popular historia O libro da selva, orixinal de Rudyard Kipling, chega este domingo ao Auditorio (12:00 h) en formato de teatro musical da man de Teatro Avento. A compañía galega realiza en Ourense a segunda parada na xira de estrea da súa nova montaxe, que iniciara o pasado domingo enchendo de público o Auditorio de Vigo. O espectáculo de Teatro Avento ponlle cancións e coreografías a esta eterna historia, pola que non pasa o tempo, que fala de valores como a camaradería, o sentido de comunidade, e a tolerancia aos distintos a nós. As entradas pódense adquirir na páxina web www.ataquilla.com, no teléfono 902 504 500, na Sede de Afundación (Praza Maior, 4) e no despacho de billetes do Auditorio dúas horas antes da función.
    Avento Producións Teatrais é unha compañía fundada en 1985 e que foi referente teatral en Vigo nesa época, acadando a nivel non-profesional 70 premios en certames nacionais. Na actualidade, como compañía profesional, realiza musicais teatrais dirixidos ao público familiar, buscando a diversión e a creación de novos públicos, con4 espectáculos estreados: Laranxus 7, O Mago de Oz, Fantasticks e Hansel e Gretel.
     
    Sinopse
    Mowgli é curioso, desobediente, parvo e ousado. Así como calquera rapaz que coñezas, sabes? Esta nova adaptación da historia de Rudyard Kipling fala sobre a estraña historia dun neno perdido na selva india. Acabará sendo adoptado por Baloo o oso, a pantera Bagheera e todos os animais que chaman á misteriosa xungla, fogar. Esta adaptación de ritmo rápido manterá pegado ao público ao borde do asento mentres Mowgli se atopa cara a cara con monos folgazáns, voitres ruidosos e o seu inimigo mortal: o tigre Shere Khan.
    O libro da selva, publicado en 1894, é unha colección de historias escritas polo inglés nacido en India, Rudyard Kipling (Bombay, 1865 – Londres, 1936), o primeiro escritor británico en ser galardonado co Premio Nobel de Literatura en 1907. A historia, que foi inicialmente publicada en revistas, baséase en contos que formulan reflexións morais e protagonizados por nenos (un deles con capacidade para falar cos animais) e por animais con capacidade para razoar e falar. Aínda que a obra orixinal estaba dirixida a un público adulto, a súa adaptación cinematográfica por Walt Disney fíxoa moi popular entre o infantil.
     
    Ourense, 14 de febreiro de 2020.-
     
    A compañía galega Matarile Teatro presentará mañá, sábado, 15 de febreiro ás 20:30 horas no Auditorio a súa nova obra: Daimon y la jodida lógica, un espectáculo de grande formato, cun equipo de 14 persoas, con 9 intérpretes e 4 músicos, en que mistura teatro, danza e música en escena. 
    O concelleiro de Cultura, Mario González, e a directora Ana Vallés, presentaron esta mañá esta nova creación da compañía galega, que acadou un grande éxito no festival internacional de outono de Madrid, e que percorrerá durante o ano 2020 diferentes cidades españolas: comezando por Ourense, para continuar logo en Santiago, Valladolid, Xixón e Murcia.
     
    O título da obra Daimon y la jodida lógica alude a un concepto mitolóxico que pode significar, segundo o contexto, “o destino, a voz da conciencia, a intuición... Unha presenza oculta, imprevisible que determina actos e decisións que non podemos explicar racionalmente”, en palabras da autora e directora da obra.
    Compañía dirixida por Ana Vallés e Baltasar Patiño, Matarile conta cunha traxectoria de 33 anos adicados á creación dun teatro que se caracteriza pola innovación, enmarcada nas artes escénicas contemporáneas-
     
    As entradas, desde 8 euros, pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e na despacho de billetes do Auditorio dúas horas antes da función.
     
    Ourense, 12 de febreiro de 2020
     
    Máis de 2.000 persoas visitaron até hoxe a exposición Retrospectiva, que recolle medio cento de obras de Carmucha Vázquez Prats que percorren a súa obra e resumen a súa vida pictórica. Esta mañá tivo lugar a presentación do catálogo desta exposición, que está aberta ao público até o domingo na Sala Valente. A artista expresou a súa ledicia e agradecemento polos resultados da mostra, tanto pola afluencia de público, que cifrou en máis de 2.000 persoas, como polo apoio recibido por parte do Concello, polo equipo da Sala Valente e pola calidade do catálogo.
     
    A mostra foi un éxito tremendo, en palabras da directora de espazos expositivos do Concello, Eva Torres, quen subliñou que Vázquez Prats é unha artista que vive da sala, da súa obra e da súa xente, xa que foi partícipe da exposición constantemente, coa súa presenza na propia sala. 
     
    Pola súa banda, o concelleiro de Cultura, Mario González destacou a calidade da mostra que, recoñeceu, visitou en moitas ocasións “sacándolle todo o xugo a Carmucha, que nos contou toda a súa historia, e incluso pequenas anécdotas que estaban escondidas detrás destes cadros”, subliñando que foi un pracer coñecer a Vázquez Prats, como artista e como persoa. Tamén puxo en valor a achega da Sala Valente á programación cultural da cidade: “seguimos traballando neste marabilloso espazo, que é un pulmón de cultura para a cidade, e seguiremos apoiando o traballando o traballo dos artistas de Ourense”.

    Carmucha Vázquez Prats
    Muller adicada á pintura dende nena, Vázquez Prats é un exemplo de constancia, traballo e implicación artística. Fixo a súa primeira exposición nos anos 50, e desde aquela realizou continuas mostras a nivel nacional e internacional. Vázquez Prats procede a pinceladas curtas, case unánimes, que van compoñendo con pequenos fragmentos de cor a paisaxe estremecida da súa pintura. Son pinceladas sinxelas, mais sinceras e alleas ao efectismo fácil, que se esparexen polo fondo do cadro coa mesma minuciosidade de procedemento que cando tocan a figura protagonista. 
     
    A mostra pódese visitar até finais desta semana: o sábado, de 13.30h e de 18.30h a 21.30h e os domingos de 11h a 13.30h. 
     
    Ourense, 10 de febreiro de 2020.-

    As compañías de teatro Matarile e Sarabela presentan esta fin de semana, no Auditorio de Ourense, as súas propostas teatrais dirixidas ao público adulto e infantil, respectivamente. Será dentro dunha programación cultural que comeza o venres coa presentación do novo disco d'A Banda da Loba.
    As entradas para os tres eventos pódense adquirir en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio dúas horas antes de cada función.
     
    Venres 14 de febreiro, 20:30 horas. 6 euros. Todos os públicos.
    A BANDA DA LOBA. Presentación do disco Fábrica de Luz (2019)

    Despois do éxito acadado co seu primeiro disco, Bailando as rúas (2017), a banda estradense presenta o seu segundo traballo, Fábrica de luz Fábrica de Luz (2019), composto por doce cancións que prometen non deixar a ninguén indiferente. É un traballo de creación, reflexión e homenaxe en torno á idea de nai entendida nun sentido amplo. A lingua e a terra, son as primeiras nais, fábricas de luz. As creadoras que nos precederon e as que nos acompañan nesta viaxe son tamén fábricas de luz. As nosas nais, as vosas nais, todas as nais son fábricas de luz. Son fogar, tempo e amor incondicional. Son poder, loita e memoria. Son todo o que nos permite ser hoxe tamén fábrica de luz.
     
    Sábado 15 de febreiro, 20:30 horas. 8 euros. Público adulto.
    DAIMON Y LA JODIDA LÓGICA, de Matarile Teatro

    Anxo ou demo, o murmurio da voz interior que detén ou empurra. Significado que podemos interpretar pero non comprender. Alma, animal interior: profundo, fatal, opaco. Presenza oculta, imprevisible, que determina actos e decisións que non podemos explicar racionalmente. Ás veces agochado e ás veces por diante dous pasos. Ocúpanos,acompáñanos,céganos,impúlsanos. Entra aínda que pechemos a porta. Dirección de Ana Vallés. 
     
    Domingo 16 de febreiro, 12:00 horas. 3 euros. Infantil (5-12 anos).
    PROXECTO NOÉ, de Sarabela Teatro

    Tres pingüíns, o diluvio universal e dous únicos boletos para a arca de Noé son os elementos desta historia narrada cunha linguaxe sinxela e contundente.
    Os pingüíns reflexionan sobre a natureza, sobre o valor da amizade: como facer para salvarse os tres cando só teñen dúas pasaxes? Cando está permitido e cando non romper as regras? Que xustifica facelo?
     
    Páxinas: Primeiro ... 2 3 4 5 6 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica