CONTACTO

  • Audi
  • I. Tascón
  • prem lit
  • MMOu
  • EdC
  • Volver

    Ourense, 5 de novembro de 2019.-
     
    A Concellería de Medio Ambiente aposta por un Magosto de carácter sostible e responsable neste ano 2019. Para iso, desenvolverá unha novidosa campaña coa que busca involucrar os cidadáns de todas as idades a través de dúas accións moi concretas: a reciclaxe de vidro e a educación. O responsable da área, Jorge Pumar, lembrou que “o Magosto é a festa da identidade de Ourense”, dixo. “Queremos que a xente participe, que o pase ben, pero tamén que respecte os espazos comúns, pero o obxectivo desta campaña é chamar a atención sobre o lixo que deixamos no monte e, ao mesmo tempo, traballar cos nenos, o futuro de Ourense, na educación ambiental”.
     
    O Concello de Ourense quere dar un exemplo de civismo e de respecto pola natureza nesta festa, declarada de interese turístico de Galicia, e lanzar unha imaxe de cidade sustentable. Neste sentido, a campaña presentada hoxe en rolda de prensa establece dous obxectivos fundamentais a través dunha alianza cos entes referentes da reciclaxe de España, Ecovidrio, que fai unha forte aposta pola nosa cidade ao involucrarse de forma clara na campaña de Ecomagosto. 
     
    Así, este luns 11, Ecovidrio instalará no Magosto popular do parque do Barbaña dous iglús onde cada ourensán poderá cambiar tres botellas ou tarros por unha árbore, o castiñeiro, en horario de 16:30 a 19:30 horas. Con esta acción, “Ecovidrio pretende trasladar a mensaxe de sustentabilidade ambiental, tanto desde o punto de vista da reciclaxe do vidro como convidando a veciñanza a plantar árbores”, en palabras de Germán Fernández, xerente da asociación sen ánimo de lucro para Galicia e o norte de España.
     
    A segunda acción será o 12 de novembro, co obxectivo de chamar a atención sobre o impacto dos magostos no monte ourensán. Así, 300 nenos -dos centros de Salesianos e Maristas- percorrerán os arredores do Montealegre coa fin de limpar os restos dos efectos dos magostos. “Os nenos son o futuro da cidade de Ourense, é un investimento en educación ambiental para o futuro”, dixo Jorge Pumar, que anunciou ademais obradoiros de reciclaxe e de plantación de árbores no Botánico.
     
    Esta actividade recibiu o recoñecemento do programa Ecólatras, unha iniciativa nacional de fomento para a reciclaxe de residuos, e en particular do vidro, que fomenta accións comunitarias de reciclaxe. Pero non será a única política medio ambiental que ampare a campaña: contarase coa axuda de Ecovidrio; da campaña “Separa con xeito” da Xunta de Galicia e Ecoembes; coa participación da Campaña “Cada lata conta”, programa de educación ambiental financiado pola Unión Europea; e co apoio de Ecourense para os procesos de recollida selectiva. Ademais mención especial para Sustinea, entidade ambiental colaboradora da acción. 
     
    Ourense, 4 de novembro de 2019.-
     
    A cita co Enclave de Cámara adiántase este mes de novembro ao mércores -6 de novembro- para recibir o cuarteto de corda Simply Quartet, que dará inicio a unha semana de intensa actividade na axenda da Concellería de Cultura. 
     
    Mércores, 6 de novembro. Liceo. Ás 20:00 horas. 
    Enclave de Cámara: Simply Quartet. Venda de entradas na billeteira do Liceo ou na páxina web www.ataquilla.com
    Orixinalmente chinés, o Simply Quartet trasládase a Viena en 2012 para estudar co profesor Johannes Meissl (Artis Quartet) no Instituto Joseph Haydn para Música de Cámara na Universidade de Música e Artes Escénicas de Viena. No seu repertorio podemos escoitar obras de Haydn, Shostakovich e Mendelssohn. Centrados nos últimos anos nas raíces do repertorio xermánico e austríaco para cuartetos de corda, teñen acadado éxito no Concurso Haydn en Viena, en 2017, e no Concurso Internacional de Música de Cámara “Schubert e a Música Moderna” de 2018. Actualmente, Simply Quartet é o último gañador do Concurso Internacional de Cuartetos de Corda de Bordeos. 
     
    Simply Quartet son: Danfeng Shen, violín; Antonia Rankersberger, violín; Siang Lyu, viola; e Ivan Valentin Hollup Roald, violonchelo. [Máis información]
     
    Xoves, 7 de novembro. Auditorio Municipal. Sala Principal. 20:30 horas. 
    O meu mundo non é deste reino, de Teatro da Ramboia. Estrea. 80 minutos. Entrada: 3€, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Obra gañadora da última edición do Premio de Teatro Manuel María. Unha obra dirixida a todos os públicos baseada no texto O meu mundo non é deste reino ou farsa de Bululú, unha parodia sobre a ditadura franquista. María Peinado, Fran Lareu, Anxo García ou Germán Gundín, entre outros, dan vida a un par de trapeiros fan unha parada no seu camiño despois de días de longa viaxe. Traen consigo unha carga enorme de obxectos estraños. Abraiados ante a abundancia de público, dispóñense a situar as súas pertenzas no espazo con ánimo de venderlle algunha aos alí reunidos. Coma os máis experimentados vendedores de fume, deixan o seu ben máis atesourado para o final; un tutilimundi que contén nos seus adentros o condenado reino de Bululú e os seus habitantes. E aí dá comezo a farsa. 
     
    Sábado, 9 de novembro. Auditorio. Sala Principal. 21:00 horas.
    Michael Legend, de Rababiero Promocións Artísticas. 90 minutos. Entradas: desde 18€, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Considerado como o mellor musical tributo a Michael Jackson na actualidade, é un espectáculo onde poderemos ver o mellor dobre do mundo xunto a unha banda de músicos e a un grande equipo de bailaríns, coristas e artistas convidados. Un espectáculo para todos os públicos sobre a xira de concertos This is it (2009) que ofrece o repertorio máis coñecido do Rei do Pop: Beat it, Billie Jean, Human Nature, Thriller, Man in the Mirror, Smooth Criminal, etc. 
     
    Domingo, 10 de novembro. Auditorio, Sala Azul. 12:00 horas. 
    Os romeiros do caracol, de Fantoches Baj. +6 anos. 60 minutos. Entradas: 3€ en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Os irmáns Quintá percorren o camiño de volta de San Andrés de Teixido logo de cumprir a ofrenda que lle prometeran ao seu defunto avó de levalo en forma de caracol, xa que non fora de vivo. Teatro de monicreques para a cativada.
     
    Domingo, 10 de novembro. Auditorio, Sala Principal. 20:30 horas. 
    Hijo de la luna - Tributo a Mecano, de Green Cow Music. 90 minutos. Entradas: desde 16 €, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Espectáculo para todos os públicos que recrea a última xira de Mecano, incluíndo novas coreografías, luces e cancións: Me cuesta tanto olvidarte, Maquillaje, Cruz de navajas, La fuerza del destino, Barco a Venus, Mujer contra mujer... Para conmemorar o 25 aniversario da súa última xira, nace este proxecto tributo ao grupo máis importante do pop español. Un concerto que ofrece ao público unha reprodución clonada da mítica xira, rescatando ademais, outros grandes éxitos da banda na voz da cantante Robin Torres.
     
    Ourense, 30 de outubro de 2019
    Nove procesións da Santa Compaña, cun total de 12 grupos participantes, percorrerán mañá, xoves, 31 de outubro, desde as 23.30 horas diferentes rutas pola cidade para celebrar o Samaín 2019. Os percorridos sairán desde a rúa do Paseo, rúa de Santo Domingo, Praza de San Cósmede, Praza das Mercedes, Padre Feijóo, Praza de Saco e Arce, Praza do Correxedor e o barrio da Carballeira, para avanzar cara á Praza Maior, onde se unirán todas as agrupacións participantes. Alí terá lugar á 01.00 h a actuación do grupo vasco Deabru Beltzak que representará o espectáculo de música, pirotecnia e efectos visuais “Os tambores de fogo”. Será o colofón a esta nova proposta que o Concello de Ourense inclúe para fortalecer a programación do Samaín 2019, buscando fomentar a participación de persoas de todas as idades nesta cita festiva. Tamén participará nas actividades a Escola Municipal de Teatro.
     
    Para a cativada, a programación deste ano dálles continuidade a actividades que durante os últimos anos veñen acadando unha grande participación. 
     
    Nenos e nenas poderán participar desde as 17.00 h en media ducia de actividades nas Prazas do centro histórico
     
    - Taller de baleirado de cabazas, na Praza Saco e Arce 
     
    - Microteatro na Praza da Imprenta, cun pequena representación teatral interactiva na que se lles dará a coñecer a orixe do Samaín (3 pases de 15 min).
     
    - Obradoiro Os bosques dos petróglifos, na Praza da Imprenta. Unha zona acoutada onde de maneira libre poderán participar en xogos de puntería, lóxica e de construcións, usando como materiais elementos da natureza propios da festividade do Samaín (landras, troncos, pedras, cabazas, madeira).
     
    - Obradoiro: Os artesáns do castro, na Praza da Imprenta. Un esppzo onde nenos e nenas deseñarán os seus amuletos para pasar unha boa noite de Samaín 
     
    - Obradoiro de maquillaxe e feridas, na Praza Manuel Sueiro.
     
    - Obradoiro de elaboración de chapas, na Praza Manuel Sueiro
     
    Ás 19.00 h será o Desfile de Cabazas, que sairá desde a Praza da Imprenta e avanzará polas rúas de Colón, Bispo Carrascosa e Praza Maior, para rematar con baile e festa nesta praza Uxía Lambona e a Banda Molona!!!
     
     
    Teatro no Auditorio
     
    A programación de actividades da Concellería de Cultura para mañá xoves inclúe tamén a representación teatral, ás 20.30 horas no Auditorio, da obra Bernarda, de Malasombra producións. Esta obra dramática está protagonizada polas actrices galegas Luísa Merelas (gañadora de 2 premios María Casares), Celia González e Esther Aja. Bernarda é unha historia próxima, comprensible e universal. A dunha muller dura e loitadora, produto da vida que lle tocou vivir que educa as súas fillas como mellor sabe, aínda que elas non o vexan así. Este choque xeracional por veces fainos chorar, porque ás veces as situacións vólvense tensas e duras,e por veces fainos rir, porque igual que na vida, ata nas situacións máis extremas xorde a risa como unha necesidade de desafogo e de liberación.
     
    As entradas, desde 3 euros, están á venda en Ataquilla na sala de exposicións Afundación e no despacho de billetes do Auditorio dúas horas antes da función.
     
     
    Ourense, 28 de outubro de 2019
     
    Luisa Merelas, Luis Zahera con Oswaldo Digón ou Ángeles Martín con Beatriz Bergamín subirán esta semana ao escenario do Auditorio Municipal de Ourense, que programa tres interesantes citas teatrais. 
     
    O xoves, 31, ás 20.30 horas, Malasombra producións represenrtará Bernarda, obra dramática protagonizada polas actrices galegas Luísa Merelas (gañadora de 2 premios María Casares), Celia González e Esther Aja. Bernarda é unha historia próxima, comprensible e universal. A dunha muller dura e loitadora, produto da vida que lle tocou vivir que logo de quedar viva educa as súas fillas como mellor sabe, aínda que elas non o vexan así. Este choque xeracional por veces fainos chorar, porque ás veces as situacións vólvense tensas e duras,e por veces fainos rir, porque igual que na vida, ata nas situacións máis extremas xorde a risa como unha necesidade de desafogo e de liberación. 
     
    O sábado, 2, ás 21.00 h será o turno de Muiñeiras, de MM Promocións, con dous dos mellores humoristas galegos: Luís Zahera (gañador do Goya 2019) e Oswaldo Digón, acompañados por Naiama, o grupo de gaitas que porá a banda sonora. A comedia é a protagonista deste espectáculo que combina monólogos, con música tradicional da nosa terra, e a golpe de muiñeiras. “Temos a firme intención de poñer a bailar os nosos humoristas, e por que non, o público que se achegue ao espectáculo”, di a compañía.
     
    A terceira cita será o domingo, con No hay papel, da compañía Desafora2. Unha obra escrita pola actriz, xornalista e dramaturga Beatriz Bergamín e protagonizada xunto á tamén popular actriz, produtora e empresaria, Ángeles Martín, premio da Unión de actores e actrices 2019 á mellor actriz de reparto No hay papel é a unha historia de vida, a de dúas mulleres, dúas irmáns, dúas xornalistas, dúas actrices en realidade que presentan as súas vivencias e as da sociedade na que viven, no escenario. A obra foi seleccionada para participar na XXV Muestra de Autores Españoles contemporáneos, o festival mis prestixioso de teatro de texto do Estado. 
     
    As entradas para Bernarda (desde 3 euros), Muiñeiras (12) e No hay papel (5) están á venda en www.ataquilla.com, na sala de exposicións Afundación e no despacho de billetes do Auditorio dúas horas antes da función.
     
    Ourense, outubro de 2019.- 
     
    A fundación “la Caixa” organiza un ciclo de concertos escolares que teñen como obxectivo achegarlle as artes escénicas ao público infantil e xuvenil, mediante unhas producións especialmente concibidas para eles. 
     
    Nesta ocasión, e en colaboración co Concello de Ourense, "la Caixa" presenta o espectáculo Bitácora: Un caderno musical, unha experiencia musical interpretada con instrumentos futuristas coma o theremin, o único instrumento do mundo que se toca sen necesidade do contacto físico, o keytar, metade guitarra e metade teclado, o EWI (electronic wind instrument), un instrumento de vento electrónico similar á frauta por fóra, pero con máis posibilidades harmónicas, ademais doutros moitos instrumentos singulares.
     
    Este espectáculo, no que participarán 1.500 escolares da provincia de Ourense, é unha idea orixinal de Cristina Estarelles e Albert Ruiz, e procura introducir e educar os máis novos sobre o mundo da música electrónica dun modo ameno e diferente.
     
    Bitácora: Un caderno musical é un espectáculo que incorpora ritmos electrónicos a cancións tradicionais adaptadas por Xavier Lloses. Na obra, a tripulación dun submarino perdido na inmensidade do océano acompañará o público durante unha odisea de sensacións coa axuda duns instrumentos futuristas.
     
    Os primeiros instrumentos musicais foron construídos vai 43.000 años e estaban feitos a partir de ósos de animais. A evolución dos instrumentos ten sido constante desde o seu inicio, e no espectáculo pódese apreciar que na actualidade vivimos nun mundo onde a tecnoloxía é practicamente omnipresente en todos os aspectos da nosa vida.
     
    Un dos cambios máis importantes do século XX foi a transición dos instrumentos acústicos ao emprego da electrónica, transformando a maneira na que pensamos e escoitamos música. 
     
     
    Ourense, 24 de outubro de 2019
     
    O Concello de Oruense aposta polas festividades do Samaín e Magosto 2019, ampliando a súa programación de actividades co obxectivo de potenciar estas festas, animar á cidadanía a participar nelas e converter Ourense nun referente de actividade cultural e lúdica. O Magosto, festa representativa da cidade estenderase desde o día 8 ao 11 de novembro cunha vintena de actividades entre as que salienta os concertos dunha escolma dos mellores grupos galegos, como Brañas Folk, Susane Seivane, Leilía ou Os de Abaixo, ou o Espazo Galaico que estará en Bispo Cesáreo, xunto coa tradicional magosto popular, as actividades de animación de rúa e as dirixidas ao público infantil. 
     
    O Espazo Galaico é unha das principais novidades da programación. En Bispo Cesáreo as persoas que se acheguen poderán participar en visitas guiadas ao Laboratorio do tempo, presenciar recreacións da vida nun castro celta, exhibicións de esgrima, retratarse no photocall con vestimentas e armas da época galaica, ou participar en obradoiros de amuletos, bonecos, instrumentos musicais ou banda deseñada. A festa terá un gran protagonismo da gastronomía, xa que coincidirá co concurso de pinchos Sabores de Ourense, locais de hostalería elaborarán menús especiais e as denominacións de orixe da provincia organizarán diferentes actividades e catas dos seus viños.
     
    No caso do Samaín, a programación aposta por darlles continuidade ás actividades dirixidas á rapazada, que durante os últimos anos veñen acadado unha grande participación e incorpora novas propostas para persoas de todas as idades, coa cita destacada dos Desfiles da Santa Compaña, con diferentes rutas que percorrerán as rúas da cidade até rematar na Praza Maior, onde se desenvolverá o espectáculo de música, pirotecnia e efectos visuais “Les  Tambours   de   Feu” (“ Os tambores  de  fogo”, a cargo da compañía vasca  Deabru  Beltzak.
     
    PROGRAMACIÓN DOS MAGOSTOS 2019
     
    Venres, 8 de Novembro
    De 18 a 19.30 h Animación de rúa Grupo de gaitas da AOFT e desfile de cabezudos
    20,00 h Concerto BRAÑAS FOLK na Praza Maior                                                                                       
     
    Sábado, 9 de Novembro
    De 11 a 13,30 h e de 16,30 a 20h ESPAZO GALAICO, en Bispo Cesáreo
    12,00 h Animación de rúa EQUIPO B (Charanga tradicional)
    13,00 h Animación de rúa BANDA DE GAITAS DA CARBALLEIRA
    18,00 h Animación de rúa TÍRALLE DO AIRE 
    20,00 h Concerto de SUSANA SEIVANE, na Praza Maior
     
    Domingo, 10 de Novembro
    De 11 a 13,30 h e de 16,30 h a 20h ESPAZO GALAICO, en Bispo Cesáreo
    12,00 h. Animación de rúa BANDA DE GAITAS DA DIPUTACIÓN DE OURENSE. Saída desde a rúa do Paseo (Parque de San Lázaro)
    13,00 h. Animación de rúa OS DANIÑAS 
    20,00 h. Concerto de LEILÍA, na Praza Maior
    20,30 h. Concerto A CAPELA MADRIGALISTA na catedral
     
    Luns, 11 de Novembro 
    De 11 a 13,30 h e de 16,30 h a 20,00 h ESPAZO GALAICO, en  Bispo Cesáreo
    12,00 h Espectáculo infantil AS VIAXES DE PAIO E AURELIO, na Praza Maior
    13,00 h Animación de rúa, co grupo de gaitas da AOFT 
    17,00 h Magosto tradicional coa animación musical  D´OS DANIÑAS, no Parque Barbaña, con 1.000 de castañas e 3.000 chourizos, e menús a 1 euro. 
    18,00 h. Animación de rúa TÍRALLE DO AIRE
    20,00 h. Concerto de OS DE ABAIXO, na Praza Maior
     
    PROGRAMACIÓN SAMAÍN 2019
    PROGRAMACIÓN DE TARDE
    17.00 Taller de Baleirado de cabazas, con monitores e monitoras que axudaranlle á cativada a elaborar as súas cabazas, na Praza Saco e Arce. O reparto de cabazas comezá a esa mesma hora, na asociación de veciños da cidade vella ubicada na rúa Liberdade. Daranse 800 cabazas e outras tantas candeas, unha para cada neno ou nena. 
    17.00 Microteatro, pequena representación teatral interactiva, onde se lle dará a coñecer á rapazada a orixe do Samaín. Serán 3 pases de 15 minutos na Praza da Imprenta 
    17.00 Obradoiro:  “Os bosques dos petrogriflos”, na Praza da Imprenta. Zona acoutada onde de maneira libre haberá xogos de puntería, lóxica e de construcións... onde os materiais utilizados son elementos  da natureza propios da festividade do Samaín (landras, troncos, pedras, cabazas, madeira)
    17.00 Obradoiro:  “Os artesáns do castro”, na Praza da Imprenta. Espazo onde nenos e nenas deseñarán os seus amuletos para pasar unha boa noite de Samaín co consello e guía dos mestres artesáns.
    17.00 Obradoiro de maquillaxe e feridas na Praza Manuel Sueiro
    17.00 Obradoiro de elaboración de chapas, na Praza Manuel Sueiro
    19.00 Desfile de Cabazas Percorrido: praza da Imprenta, rúa Colón , Bispo Carrascosa e Praza Maior.. Rematará con baile e festa na Praza Maior con Uxía Lambona e a Banda Molona!!!
     
    Á NOITE
    22.00 a 01.00 h Animación de rúas con Aperta e Trópico de Grelos
    23.30 h Desfile da Santa compaña. Saídas desde a rúa do Paseo, rúa Santo Domingo, Praza de San Cosme, Praza das Mercedes, Padre Feijoo, Praza de Saco e Arce, Praza do Correxedor e a Carballeira.
    01.00 h Actuación do grupo Deabru Beltzak co espectáculo “Les Tambours de Feu”, na Praza Maior
     
     
    Ourense, 23 de outubro de 2019
     
    Un deseño do artista Christian Randolfe Amorín, natural e residente da cidade, será o cartel das Festas do Magosto de Ourense 20019, unha gfesta de interese turístico. O xurado do concurso convocado polo Concello elixiu o traballo do ourensán, que representa unha lapa en cores sólidas vermella e amarela sobre fondo negro, polo seu deseño naïf ao tempo que rechamante. Un cartel directo e moi eficaz que identifica perfectamente a festa a través dun dos seus elementos máis representativos: o lume que acendemos para asar as castañas. 
     
    Christian Randolfe, de 23 anos, recibirá un premio de 800 euros como gañador do concurso. A súa creatividade será a imaxe dunha festa tradicional e representativa da cidade, que o Concello de Ourense quere potenciar decididamente desde este ano, estendendo a varios días a súa celebración e dotándoa dun amplo programa de actividades participativas, a maiores do habitual Magosto popular. 
     
    A programación completa das festas dos Magostos e do Samaín 2019 será presentada mañá, xoves, polo concelleiro de Cultura, Mario González, e técnicos desta área municipal.
     
    Ourense, 22 de outubro de 2019
     
    Un deseño da artista Anabella Labrador Sansalone, natural de Bos Aires e residente na cidade, será o cartel das Festas do Samaín de Ourense 2019. A ilustración reproduce un desfile de persoas que avanzan en procesión pola Praza Maior da cidade, portando unha vela acendida. A creatividade desta deseñadora gráfica e ilustradora está debuxada en branco e negro, resaltando con cor vermella o nome da celebración, o que lle confire unha grande eficacia á transmisión da mensaxe, destacando tamén con cor os ollos dos protagonistas, a vela, o seu lume e as luces dos edificios. A gañadora do concurso recibirá un premio de 600 euros.
     
    O xurado valorou a orixinalidade na interpretación artística, sen perder en ningún momento a alusión ao Samaín e á Santa Compaña, que este ano terá un grande protagonismo. É unha composición que invita a poboación a participar na celebración desta festa pondo en valor de éxito especial a cidade. A utilización de cores frías dende un plano monocromo potencian a forza dos tons quentes provocando curiosidade no espectador. O cartel compre coa súa finalidade de comunicarnos a mensaxe cunha mirada espontánea.
     
    A ilustración centra a atención do público nun elemento, o desfile, que o Concello quere potenciar nesta edición. Se tradicionalmente a programación do Samaín estaba dirixida á rapazada, cos obradoiros de cabazas e desfile vespertino pola zona vella, este ano incorpórase ao programa unha cita pensada xa para persoas adultas: a procesión da Santa Compaña, que servirá de colofón as actividades do día 31 de outubro. A proposta consiste na realización de distintas procesións que xurdirán desde varios puntos da cidade, percorrerán as rúas coas luces apagadas e finalmente confluirán nunha gran festa que rematará na Praza Maior.
     
    Mobilización. Desde a Concellería de Cultura convídase aos grupos que o desexen a vestirse e sumarse ás procesións, recreando libremente o que para elas representa a Santa Compaña. Para inscribirse, débese enviar un correo electrónico á Concellería de Cultura (cultura@ourense.es), especificando o nome da persoa responsable, o número de participantes e o contacto telefónico, até o luns 28 de outubro ás 14 horas.
     
    Páxinas: Primeiro ... 3 4 5 6 7 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica